သာသနာပြုတစ်ယောက်၏ အဖြေများ (၂၂)

သာသနာပြုတစ်ယောက်၏ အဖြေများ (၂၂)

ရုပ်ပွားတော်များ နှင့် ထေရ၀ါဒ

ယနေ့ခေတ်အခါ၌ ဗုဒ္ဓရုပ်ပွားတော်များ အမျိးမျိုးပေါ်ပေါက်လာခဲ့ရာ ရုပ်ပွားတော်များတွင် ရှိသင့်ရှိထိုက်သောလက္ခဏာများပျက်ယွင်းခြင်း၊ ရုပ်ပွားတော်များအား ကောလဟလမျိုးစုံဖြင့် ထုံမွမ်းထားခြင်း၊ ဂါထာမန္တရား အင်းကွက်ပေါင်းစုံနှင့်ရှုပ်ထွေးနေခြင်း စသောအကျိုးဆက်များဖြင့် ထေရ၀ါဒရှုထောင့်အရ လက်မခံနိုင်ဖွယ်တွေ့ရှိနေရသည်။ သို့ဖြစ်၍ ယခု post အား စေတနာ၊ မေတ္တာဖြင့် ကျိုးနွံ ရိုးသားစွာရေးသားလိုက်ပါသည်။

ရုပ်ပွားတော်သမိုင်းကြောင်း

ဗုဒ္ဓရုပ်ပွားတော်များ စတင်ဖြစ်ပေါ်လာခြင်းနှင့် ပတ်သက်၍ ထီးချိုင်မြို့တည်တောဆရာတော်ဘုရားကြီးမှ ဟောထားချက်များအား အောက်ပါအတိုင်းစကားပြေအရေးအသားဖြင့်ပြန်လည်ရေးသားလိုက်ပါသည်။

“ရုပ်ပွားတော်စတင်ဖြစ်ပေါ်လာခြင်းနှင့်ပတ်သက်၍ အပိုင်းနှစ်ပိုင်းခွဲနိုင်ပါသည်။ ယင်းအပိုင်းနှစ်ပိုင်းမှာ (၁) ရှေးဟောင်းအယူအဆ (၂)ခေတ်သစ်အယူဆ တို့ဖြစ်ကြသည်။ ပထမအပိုင်းအရ ရှေးဟောင်းကျမ်းများကို လေ့လာကြည့်ရာတွင် ရှေးဦးစွာ တေရသနိပါတ် ကလိင်္ဂ ဇာတ်တော်တွင် အာနန္ဒာဗောဓိပင်နှင့် စပ်လျဉ်း၍ စေတီသုံးပါးကို ဘုရားရှင်က ခွင့်ပြုပေးတော်မူခဲ့သည်။ ၄င်းစေတီသုံးပါးမှာ (၁)သာရီရကစေတီ(ဘုရားရှင်၏ကိုယ်တော်မှ ဓာတ်တော်များ)(၂)ပရိဘောဂစေတီ(ဘုရားရှင်၏ သပိတ်၊ တောင်မွေး စတဲ့ အသုံးအဆောင်များ)(၃)ဥဒ္ဒိဿကစေတီ(ဘုရားရှင်အားရည်မှန်းထားသောရုပ်ပွားတော် ဆင်းတုတော်များ) ဖြစ်သည်။ အဆိုပါ စေတီသုံးပါး အနက် သာရီရကစေတီတော်ဆိုသည်မှာ ဘုရားရှင် ပရိနိဗ္ဗာန်ဝင်စံပြီးမှဖြစ်သော ဓာတ်တော်များ ဌာပနာပြီးတည်သော စေတီဖြစ်သဖြင့် ဘုရားရှင်သက်တော်ထင်ရှားရှိစဉ်ကာလ၌ တည်ထားကိုးကွယ်ခြင်းမရှိပေ။ ကျန်သောစေတီ (၂) ပါးမှာ ဘုရားရှင်သက်တော်ထင်ရှားရှိစဉ်ကာလကပင် တည်ထားကိုးကွယ်နိုင်ကြောင်းယုံကြည်ကြသည်။ ထိုယုံကြည်ချက်ဖြင့် ဘုရားရှင်လက်ထက်တော်မှာပင်ရုပ်ပွားတော်များကို ထုလုပ်ကိုးကွယ်ကြသည်ဟု ဖော်ပြကြသည်။

ခေတ်သစ်အယူအဆအရဆိုလျင် ကျောက်စာဌာနမှ ပညာရှိပုဂ္ဂိုလ်များ၏ အယူအဆကို ကိုးကားဖော်ပြရမည်ဖြစ်သည်။ ပညာရှင်တို့၏ အယူအဆအရ ဘုရားရှင်ခန္ဓပရိနိဗ္ဗာန်ဝင်စံတော်မူပြီးနောက် နှစ်ပေါင်း ၅၀၀ ခန့်ကာလကြာအောင် ရုပ်ပွားတော်များကို ထုလုပ်ကိုးကွယ်သော အရိပ်ယောင်မျပင်မတွေ့ခဲ့ရဟုဆိုသည်။ ပိဋကတ်တော်မှာလည်း ၀ိနည်းမဟာဝါပါဠိတော်မှာ ဘုရားရှင်မှ “ငါ့မှာ ဆရာမရှိဘူး၊ လောကမှာ ငါနဲ့ တူသောအရာမရှိဘူး” လို့ဟောထားခြင်း ရှိသောကြောင့် ရုပ်ထုတော်များ မထုလုပ်အပ်ဟု ယူဆကြသဖြင့် ရုပ်ထုတော်အစား ဘုရားဖြစ်သော အထိမ်းအမှတ်အဖြစ် ဗောဓိပင်၊ ပရိနိဗ္ဗာန်စံသောအထိမ်းအမှတ်အဖြစ် ထူပါပုံ၊ တရားဟောသောအထိမ်းအမှတ်အဖြစ် ဓမ္မစကြာပုံ၊ မယ်တော်ဝမ်းတိုက်ပဋိသန္ဓေအတွက် ဆင်ရုပ်၊ တော်ထွက်တော်မူခြင်းအတွက် မြင်းရုပ်၊ သီဟနာဒအထိမ်းအမှတ်အဖြစ် ခြင်္သေရုပ် များကိုထုလုပ်ကိုးကွယ်ခဲ့ကြသည်။ ဗုဒ္ဓဘာသာဝင်များမှာ ရုပ်ပွားတော်များအား မထုပ်လုပ်ဘဲ အမှတ်သင်္ကေတလောက်ကိုသာ ထုလုပ်ကိုးကွယ်ခဲ့ကြသော်လည်း ဗုဒ္ဓဘာသာဝင်မဟုတ်သောပုဂ္ဂိုလ်များမှာ ရှေးအခါကာလကပင် ဗြဟ္မာရုပ်၊ ဗိဿနိုးရုပ်၊ သီဝနတ်ရုပ်၊ သူရဿတီရုပ်၊ လက္ချမီရုပ်၊ ပါရာဝတီရုပ် အစရှိသော ၄င်းတို့၏ ဘုရားရုပ်ထုများကို ထုလုပ်ကိုးကွယ်လေ့ရှိကြသည်။
သာသနာတော် နှစ် ၅၀၀ လောက်၌ အိန္ဒိယပြည်ကြီး၏ အနောက်မြောက်နယ်ဖြစ်သော ကသျမီရ၊ ဂန္ဓရ နယ်တစ်ဝန်းမှာ ထေရ၀ါဒဂိုဏ်းအားနည်းပြီး မဟာယာနဂိုဏ်းအားကောင်းနေခဲ့သည်။ ၀င်ရောက်လာသည့် ဂရိများသည် မဟာယာန ဂိုဏ်း၏ လွမ်းမိုးမှုကြောင့် မဟာယာနသာသနာဝင်များဖြစ်သွားကြသည်။ မဟာယာနသာသနာ၏ အချို့နေရာများမှာ ဟိန္ဒူတို့၏ အယူဝါဒများရောနှောနေသဖြင့် ဂရိဘာသာဝင်တို့မှာလည်း ဗုဒ္ဓရုပ်ပွားတော်များကို စတင်ထုလုပ်ကိုးကွယ်ခဲ့ကြသည်။ ဂရိတို့ ထုလုပ်ထားသော ရုပ်ပွားတော်များကို အတုယူလျက် ရုပ်ပွားတော်ထုလုပ်ကိုးကွယ်မှုသည် တစ်ကမ္ဘာလုံးပျံနှံလာခဲ့သည်။ သို့ဖြစ်သဖြင့် ရုပ်ပွားတော် စတင်ထုလုပ်ကိုးကွယ်ခြင်းသည် မဟာယာနဗုဒ္ဓဘာသာဝင်များမှစခဲ့သည်ဟု ဆိုနိုင်သည်။ နောင်အခါ၌ ဘုရားရှင်ကို အာရုံပြုရာမှာ ရုပ်ပွားတော်ရှိလျင် ပိုမိုလွယ်ကူတယ်ဟု ယူဆပြီး ထေရ၀ါဒဘာသာဝင်တို့မှလည်း ရုပ်ပွားတော်များထုလုပ်ကိုးကွယ်လာခဲ့ကြသည်”။ ။

အထက်ပါ အယူအဆ နှစ်ခု အရ ရုပ်ပွားတော်များ ထုလုပ်ကိုးကွယ်မှုသည် ကိုးကွယ်၍ လည်း မမှားနိုင်သလို၊ မကိုးကွယ်၍လည်း မမှားနိုင်သည်ဟု ယူဆရပါသည်။ သို့ရာတွင် ရုပ်ပွားတော်များကို စိတ်ကူးယဉ်ပြီး ထုလုပ်ထားခြင်းမျိုးမဟုတ်ဘဲ ထေရ၀ါဒရှုထောင့်အရ ကိုက်ညီသောထုလုပ်ကိုးကွယ်ခြင်းမျိုးဖြစ်ရန်မှာ အရေးကြီးပါသည်။ ယင်းနှင့်ပတ်သက်၍ ဆရာဒေါက်တာအောင်ဆန်း(ဒါးက) မှာဤသို့ဆိုခဲ့ဖူးပါသည်။

ရုပ်ပွားတော် လက္ခဏာများ

“မြတ်စွာဘုရား၏ရုပ်ပွားတော်တို့ကို စိတ်ကူးယဉ်ပြီး လှလှပပ ထုလုပ်ထားခြင်း မဟုတ်သည်ကို သတိချပ်စေလိုပါသည်။ သုတ်သီလက္ခန်၊ သုတ်ပါထေယျ၊ သုတ်မဟာဝါ စသည်သုတ္တန်ကျမ်းများတွင် ပါဝင်သော မြတ်စွာဘုရားကိုယ်တော်၏ အမှတ်အသားလက္ခဏာတော်ကြီး ၃၂ ပါး၊ ထိုထက် အသေးစိတ်မှတ်သားထားသော လက္ခဏာတော်ငယ် ၈၀တို့မှ ပုံဖော်၍ ရသမျကို စည်းကမ်းတကျ လိုက်နာပုံဖော်ရပါသည်။ ဘုရားထုလုပ်ရာတွင် ရုပ်ပွားရုပ်ထု အကြီးအသေး အရွယ်တော်အလိုက် အချိုးအစားကျစေရန် ထုပ်လုပ်သည့် နည်းစနစ် ၁၁၈ မျိုးထိရှိကြောင်း မှတ်သားရဖူးပါသည်။
ဘုရားရှင်၏ ရုပ်ပွားတော်ကို ရွံဖြင့်ဖြစ်စေ၊ သစ်သားဖြင့်ဖြစ်စေ၊ ကျောက်ဖြင့်ဖြစ်စေ၊ ပလတ်စတာဖြင့်ဖြစ်စေ မိမိကျွမ်းကျင် သောအသားဖြင့် ထုလုပ်ကိုးကွယ်နိုင်ကြပါသည်။ မည်သည့်ဝတ္ထု မည်သည့် အသားဖြင့်ထုလုပ်ကောင်းသည်၊ မည်သည့်ဝတ္ထု မည်သည့်အသားဖြင့် မထုလုပ်ကောင်းဟု အဆိုအမိန့်မရှိပါ။ အထူးသဖြင့် အများယူဆနေသည့် ကျောက်ဆင်းတု မြတ်စွာဘုရား၏ ရုပ်ထုတော်ကို အိမ်မှာ မကိုးကွယ်ကောင်းဟူသော အယူအဆမှာ မမှန်ပါ။ ထုလုပ်ကိုးကွယ်သောအခါ ဖူးမြင်ရသူများ ကြည်ညိုစဖွယ်သပ္ပယ်သော အသွင်ရှိဖို့သာ လိုပါသည်။
ဇမ္ဗုပတိချွတ်ခန်းမှ လာသည်ဆိုသေ မင်းမြောက်တန်ဆာဝတ်ဆင်းတုတော်များသည်လည်းကောင်း၊ ၃၁ ပါးသောလက္ခဏာတော်တို့နှင့် မကိုက်ညီသော ဒက္ခိဏသာခါဟု ခေါ်ဆိုနေသော ရုပ်ပွားတော်တို့သည်လည်းကောင်း စဉ်းစားဖွယ်ကောင်းလှပါ၏။
မဟာကရုဏာဝါဒီဖြစ်သော မြတ်စွာဘုရားရှင်အား တိရစ္ဆာန်မျိုးစုံစီး၍ ထိုင်နေတ်ာမူသည့် ပုံတော်များသည် ဘုရားရှင်၏ မဟာကရုဏ ကနာထ ဂုဏ်တော်ကို ဖျက်ဆီးနှိမ့်ချခြင်းဖြစ်၍ စီးပွားရေးသမားတို့ ဂိုဏ်းဆရာတို့ အဆန်းထွင်ပြုလုပ်စီရင်သော ပုံတော်များကို ရှောင်သင့်ကြောင်း သုတေသနသရုပ်ပြ အဘိဓာန် ကျမ်းပြုဆရာတော် ဦးသြဘာသာဘိဝံသ၏ အဆိုအမိန့်မှာ မှတ်သားဖွယ်ကောင်းလှပါသည်”။ ။

အရှင်ကုမာရမှာလည်း ဒက္ခိဏသာခါ ရုပ်ပွားတော်နှင့် ပတ်သက်၍ “ယခုကာလ၌ ကိုးကွယ်နေကြသော ပုပု၊ သံမှိုများ နှက်ထားသော ဒက္ခိဏသာခါ ပုံတော်မှာ ဂိုဏ်းဆရာများထွင်လိုက်သောပုံတော်များသာဖြစ်သည်”ဟုဆိုသည်။

အချို့ရုပ်ပွားတော်များမှာ သတ်မှတ်ထားသော လက္ခဏာရပ်များနှင့် မကိုက်ညီသည့် အပြင် အင်းကွက်များချထားသော ရုပ်ပွားတော်များ၊ ပြုံးရယ်ပြသော ရုပ်ပွားတော်များ၊ မျက်တောင်ခတ်ပြသော ရုပ်ပွားတော်များ စသဖြင့် ကိုးကွယ်သူ လောကကြီးရင်ကြီးသလောက် လိမ်ညာသူ ဥာဏ်၇ွင်သလောက် ရုပ်ပွားတော်များကို မကြောက်မလန့် လုပ်ချင်သလိုလုပ်နေကြသည်ကိုလည်း မလွတ်တန်းတွေ့နေရသည်။
ရယ်နေဟန် ရုပ်ပွားတော်များ အင်းကွက်ချထားသောရုပ်ပွားတော်များနှင့် စပ်လျဉ်း၍ ဆရာကြီး မင်းနန် မှလည်း ယခုလိုဆိုခဲ့သည်။

“ကျွန်တော်ကမူ မြတ်စွာဘုရား ပုံတော်ရယ်နေဟန် ထုလုပ်ထားသည်ကို ဘ၀င်မကျ။ အဘယ့်ကြောင့်ဆိုသော ဗုဒ္ဓစာပေထဲတွင် ဘုရားရှင်ရယ်တော်မူသည်ဟု တစ်လုံးတစ်ပါဒမျ ဖော်ပြမထားသောကြောင့်ဖြစ်ပါသည်။ ဘုရားရဟန္တာတို့မည်သည် ခံစားမှုဝေဒနာများက လွတ်မြောက်ပြီးသူများဖြစ်ပါသည်။ စိတ်ခံစားမှုနှင့် ကိလေသာမှန်သမျ လုံးဝကင်းစင်ပြီးဖြစ်ပါသည်။ ဘုရားရှင်တို့မည်သည် ပုထုဇဉ်တို့ကဲ့သို့ ရယ်တော်မမူပါ။
ပုံတော်၏ ကျောဘက်တွင် အင်းကွက်ထည့်ထားခြင်းမှာလည်း ထေရ၀ါဒ ဗုဒ္ဓဘာသာကို အတွင်းဝင်ပူးသတ်ခြင်းသာဖြစ်ပါ၏ အဘယ့်ကြောင့်ဆိုသော် မြတ်စွာဘုရားသည် အင်းအိုင်၊ လက်ဖွဲ့၊ အဆောင်စသော လောကီအစီအရင်များကို ယုတ်နိမ့်သော အတတ်ပညာများအဖြစ် ပယ်မြစ်ရှုတ်ချတော်မူခဲ့သောကြောင့်ဖြစ်သည်။” ။

မျက်တော်ခတ်ရုပ်ပွားတော်များ၊ မျက်ရည်ကျရုပ်ပွားတော်များကိုလည်း ဆရာကိုရွှေသောင်းဝင်း မှ ဤသို့သတိပေးထားသည်ကိုလည်းတွေ့ရသည်။

“စာရေးသူ ယခု ဖူးမြော်နေစဉ် မျက်တောင်တော်ခတ်ပြလေသလော ဟူသော သံသယဖြင့် သွားရောက်ကြည့်ရှုပြီး ဂေါပက မေးမြန်းရာ မဟုတ်ပါကြောင်း၊ ယခင်က ဖြစ်ဖူးခဲ့ကြောင်းသာ ပြောပြပြီး ဓါတ်ပုံပြပါသည်။ ပူဇော်ရန်လည်း တိုက်တွန်းပါသည်။ ထိုစဉ်က ယခုလို ကာလာပုံများမရှိသေးပါ။ အဖြူအမည်းသာဖြစ်ပါသည်။ ပုံတော်မှာ အမှန်တကယ်ပင် မျက်စိဖွင့်ထားသည့်ပုံဖြစ်ပါသည်။ အသေအချာကြည့်မှ ဓါတ်ပုံပညာဖြင့် မျက်လုံးတော်ဖွင့်နေပုံ ဖန်တီးထားကြောင်းသိရပါသည်။
မဟာမုနိဘုရားကြီး မျက်ရည်တော်စိးကျတော်မူသည်ဟူ၍ မန္တလေးတွင်ဖြစ်ခဲ့ဖူးပါသည်။ စာရေးသူတို့ မန္တလေးတွင် ရှိပါသည်။ ကြားသာနေ၍ မမြင်ဖူးလိုက်ပါ။ ဘယ်သူတွေမြင်တွေ့သလဲဆိုသည်ကို ဂေါပကများပင်တိတိကျကျ မသိပါ။ ဘုရားရှင်တို့မည်သည် ချင်ခြင်း မုန်းခြင်း အလျင်းမရှိတော့ပါ။ မျက်ရည်ကျခြင်းသည် ချစ်ခြင်း မုန်းခြင်းကြောင့်ဖြစ်သည်။ ဘုရားရှင်တို့သည် လောကဓံကြောင့် တုန်လှုပ်မှုမရှိတော့ပါ။ ပကတိ ငြိမ်းအေးသောတာဒိဂုဏ်နှင့် ပြည့်စုံပေသည်။ အာရုံအပေါ် အချိုးညီထားတတ်သည့် ဥပေက္ခာပါရမီရှင်တစ်ဦးအနေဖြင့် မျက်ရည်ကျသည်ဆိုလျင် ဘုရားရှင်ကိုပင် ပြစ်မှားရာကျတော့သည်။” ။

တစ်ချို့မှာ ဗုဒ္ဓရုပ်ပွားတော်များကို တန်ခိုးကြီးတယ်၊ ဆုတောင်းပြည့်တယ် စသဖြင့် ခွဲထားကြသေးသည်။ ယင်းနှင့် ပတ်သက်၍လည်း ဆ၇ာကြီး သုခမိန်မှ အောက်ပါအတိုင်း ရေးသားထားသည်မှာ ဂရုပြုမှတ်သားဖွယ်ဖြစ်သည်။

“စေတီပဲဖြစ်ဖြစ် ထူပါပဲဖြစ်ဖြစ် မြတ်စွာဘုရားရဲပ ဆံတော်၊ ဓမ္မတော်၊ ဓာတ်တော် တစ်ခုခုကို ဌာပနာပြီး တည်ထားကြတာပဲမဟုတ်လား။ ကြည်ညိုတဲ့ စိတ် စေတနာချင်းတူ၇င် အကျိုးပေးချင်းတူရမှပေါ့။ ဒီဘုရားထက် ဟိုဘုရားက တန်ခိုးကြီးတယ်၊ အစွမ်းထက်တယ် ဆိုတာဖြစ်နိုင်ပါ့မလား။ သဗ္ဗေ စိတ္တေ ပသာဒမှိ၊ သမံပုညံ ဖဟမ္ဖလံ လို့ကျမ်းဂန်တွေမှာဆိုတယ်။ ဒီဘုရားဆုတောင်းပြည့်တယ်ဆို၇င် ဟိုဘုရားကတော့ ဆုတောင်းမပြည့်ဘူးလား။” ။

ယခု လို ဆရာတော်ကြီးများစွာ၊ စာရေးဆရာများစွာ တို့မှ အထက်ပါအတိုင်း ထေရ၀ါဒ သာသနာတော်ကို ၀ိုင်းဝန်းကာကွယ်နေကြသည်ကိုတွေ့ရပါသည်။ သို့သော်လည်း အလိုရမက်တောက်လောင်နေသော အမည်ခံ ဗုဒ္ဓဘာသ၀င်တို့မှာလည်း တတ်စွမ်းသမျ လိမ်မည့်သူများကို ရှာဖွေလျက် အလိမ်ခံနေကြပါသည်။ တကယ်တော့ အလိမ်ခံနေရသူများမှာ ဗုဒ္ဓအကြောင်းကောင်းကောင်းနာမလည်သူများသာဖြစ်သည်။ ဗုဒ္ဓသည် ပရိနိဗ္ဗာန်စံပြီးဖြစ်ကြောင်း၊ ဗုဒ္ဓသည်မည်သို့သို့ သဘောထားရှိကြောင်းတို့ကို ကောင်းစွာ သိနားလည်ထားခြင်း မရှိသောကြောင့်သာဖြစ်သည်။

ကိုးကားချက်များ

ထီးချိုင်မြို့တည်တောဆရာတော်ဘုရားကြီး(ယနေ့ဗုဒ္ဓ၀ါဒဆိုင်ရာ အမေးအဖြေများ ၂)
မင်းနန်(ထေရ၀ါဒရှုထောင့်)
အရှင်ကုမာရ(ဗုဒ္ဓ၀ါဒဆိုင်ရာ သိကောင်းစရာ အမေးအဖြေများ)

ရေးသားသူ - သန့်စင်သူ

Posted in: တရားမှတ်စု